Një raketahedhës M80, kalibër 64mm, është gjetur i mbështjellë me një qese të zezë në zonën kufitare të Zubin-Potokut, në afërsi të fshatit Kleçkë.

Lajmin e ka konfirmuar zëvendësdrejtori i Policisë për rajonin e Mitrovicës së Veriut, Veton Elshani, i cili ka deklaruar se aktualisht nuk ka persona të dyshuar apo të arrestuar në lidhje me rastin.

Sipas tij, patrullat policore kishin dalë në terren për të monitoruar rrugët alternative të përdorura për kontrabandë, kur kanë hasur në objektin e dyshimtë. Pas mbërritjes së ekspertëve të forenzikës rajonale, është konstatuar se bëhej fjalë për një raketahedhës.

Ngjarja ka ngritur shqetësime për sigurinë në rajonin kufitar, ndërkohë që autoritetet po hetojnë për origjinën dhe qëllimin e armës së gjetur.