Tërmetet vazhdojnë të godasin ishullin e famshëm të Santorinit, një ndër destinacionet më të vizituara turistike të Greqisë, duke sjellë pasiguri dhe shqetësim mes banorëve dhe turistëve. Pamjet nga ishulli tregojnë rrugë të boshatisura dhe njerëz që mundohen të kapin traget për t’u larguar, ndërkohë që shumë biznese janë mbyllur dhe një numër i konsiderueshëm banorësh kanë ikur.

Një shqiptar, Niko Topuzi, i cili jeton në Santorini prej 30 vitesh, ka treguar se nuk ka ndërmend të largohet dhe të lërë gjithçka pas. Ai shpjegon se, pavarësisht pasojave të tërmeteve, ai është i lidhur ngushtë me ishullin dhe nuk ka ndërmend të largohet. “Unë personalisht nuk do të iki, nuk do të lëviz fare. Kam shumë kontakte me njerëz, edhe shumë të moshuar. Ata kanë mbijetuar tërmete edhe më të fuqishme,” thotë ai.

Topuzi, që punon në sektorin e hotelerisë, tregon se shumë biznese janë mbyllur për shkak të largimit të punonjësve dhe turistëve, megjithatë, ai thotë se ka ende disa vizitorë, kryesisht nga Amerika Latine dhe Azi. Autoritetet ende nuk kanë dhënë ndonjë urdhër për largimin e njerëzve, dhe shumica e atyre që kanë ikur, janë larguar me dëshirën e tyre.

“Po të thonë që të largohemi, edhe unë do të iki, por tani as nuk e imagjinoj të largohem,” shton Topuzi, duke theksuar lidhjen e tij të fortë me ishullin.