Vajza e 74-vjeçarit Hekuran Gjoni ka treguar detaje tronditëse nga ngjarja e rëndë ku i ati i mori jetën të birit, Asim Gjoni. Ajo ka shpjeguar momentet e fundit para tragjedisë dhe çfarë ndodhi në familjen e tyre atë natë.

Sipas saj, gjithçka ndodhi kur ata ishin duke ngrënë bukë. Vëllai, Asimi, kishte ardhur i dehur dhe kishte nisur të provokonte të atin me akuza dhe fjalë fyese. Ai e kishte akuzuar për tradhti ndaj së ëmës dhe e kishte ngacmuar fizikisht.

“Po hanim bukë unë, mami dhe babi. Babi dhe Asimi kishin pirë shumë. Ky e ngacmoi babin me fjalë të rënda, duke i thënë ‘ti ke pasur dashnore këtë e atë’. E preku babanë në vende intime dhe e ngacmonte se kishte tradhtuar nënën. Babi i gjuajti me shpullë dhe i tha ‘o maskara, se ke motrën këtu’”, tregon ajo.

Më pas, situata u përshkallëzua kur Asimi e kapi të atin nga fyti dhe nuk e lëshonte. Vajza u ngjit me shpejtësi në katin e dytë për të kërkuar ndihmën e vëllait tjetër, por kur zbritën poshtë, tragjedia tashmë kishte ndodhur.

Ky rrëfim hedh dritë mbi një krim të rëndë brenda familjes, ku një konflikt i momentit përfundoi në një akt tragjik me pasoja fatale.