Një turist belg 26-vjeçar është shpëtuar mbrëmjen e kaluar nga shërbimet e Komisariatit Nr. 4 në Tiranë, në bashkëpunim me Njësinë Alpine të Forcës Kombëtare të Sigurisë. Ai kishte mbetur i bllokuar në Shkëmbin e Tujanit, si pasojë e terrenit të vështirë dhe errësirës.

Sapo u mor njoftimi për situatën, efektivët e Policisë dhe njësia alpine organizuan një operacion kërkimi për të lokalizuar dhe ndihmuar turistin. Për shkak të kushteve të vështira të terrenit, kërkimet zgjatën disa orë, por më në fund 26-vjeçari u gjet në gjendje të mirë shëndetësore dhe u nxor i sigurt nga zona e rrezikshme.

Turisti belg falënderoi punonjësit e Policisë për reagimin e shpejtë dhe ndihmën e dhënë në momentin e vështirë.

Ky është një tjetër rast që tregon angazhimin e forcave të sigurisë për mbrojtjen e jetës së qytetarëve dhe turistëve, si dhe rëndësinë e kujdesit të shtuar gjatë eksplorimeve në terrene të rrezikshme.