Babai i ish-presidentit të Kosovës, Hashim Thaçi, ndodhet në gjendje të rënduar shëndetësore dhe është shtruar në spital. Lajmin e ka bërë të ditur avokati i Thaçit, Luka Misetić, i cili njoftoi se kishte kërkuar nga Gjykata Speciale në Hagë një leje të shkurtër për klientin e tij që të mund të vizitonte babanë, por kjo kërkesë u refuzua.

“Babai i klientit tim, Hashim Thaçi, është mjaft i sëmurë dhe është kthyer në spital. Ne kishim kërkuar që Thaçit t’i jepej një lirim i shkurtër dhe i mbikëqyrur për ta vizituar për arsye humanitare. Prokuroria e Specializuar kundërshtoi dhe gjyqtarët refuzuan vizitën,” ka shkruar avokati në rrjetet sociale.

Hashim Thaçi ndodhet në paraburgim në Hagë që prej nëntorit të vitit 2020, ku po përballet me akuza për krime lufte dhe krime kundër njerëzimit nga Dhomat e Specializuara të Kosovës.

Refuzimi i kërkesës për vizitë ka ngjallur reagime dhe shqetësime në Kosovë, ku shumë mbështetës të Thaçit e shohin këtë vendim si mungesë humanizmi nga ana e gjykatës.