Tiranë – Partia Demokratike e Shqipërisë do të mbajë sot, më 8 shkurt 2025, një protestë kombëtare përpara Kryeministrisë. Tubimi do të nisë në orën 17:00 dhe pritet të zgjasë deri në orën 20:00.

Ndryshe nga protestat e kaluara, ku bllokoheshin akset kryesore të kryeqytetit, këtë herë organizatorët janë përqendruar në një protestë statike me fjalime nga liderët e opozitës dhe përfaqësues të tjerë.

Kryetari i PD-së, Sali Berisha, ka deklaruar se protesta synon të denoncojë korrupsionin e mazhorancës dhe luksin në të cilin, sipas tij, jeton Kryeministri Edi Rama. Ai ka theksuar se kjo është një betejë kundër një “regjimi të kakistokracisë” dhe ka ftuar të gjitha forcat opozitare të bashkohen në një front të përbashkët.

Policia e Shtetit ka marrë masa për ruajtjen e rendit dhe sigurisë publike. Një pjesë e bulevardit “Dëshmorët e Kombit” do të mbetet e bllokuar për qarkullimin e automjeteve nga ora 14:00 deri në përfundimin e protestës. Gjithashtu, është vendosur ndalimi i parkimit në disa segmente rrugore kryesore të kryeqytetit.

Opozita ka paralajmëruar se protesta do të ketë një organizim të veçantë dhe se do të përdoren taktika të reja për të shprehur pakënaqësinë ndaj qeverisë. Berisha ka lënë të hapur mundësinë e protestave të tjera në të ardhmen, duke deklaruar se beteja e opozitës nuk do të ndalet.

Pjesëmarrja në protestë mbetet një faktor kyç, ndërsa mbetet për t’u parë se sa do të jetë numri i qytetarëve që do t’i bashkohen këtij tubimi.