Partia Demokratike e Kosovës (PDK) ka reaguar pas publikimit të rezultateve të Exit Poll-eve, duke theksuar se mbeten të kujdesshëm dhe të përkushtuar për një numërim korrekt të çdo vote.

Në një konferencë për media, Blerand Stavileci tha se PDK është e bindur se vullneti i qytetarëve reflektohet më mirë në votën e numëruar sesa në rezultatet preliminare të Exit Poll-eve.

“Ne jemi të sigurt që vullneti i qytetarëve reflektohet më mirë sesa çfarë pasqyrojnë rezultatet preliminare të Exit Poll-eve. Prandaj, mbetemi të kujdesshëm dhe të përkushtuar që çdo votë të numërohet me korrektësi dhe transparencë,” tha Stavileci.

Ai shtoi se PDK do të presë përfundimin e numërimit zyrtar para se të dalë me qëndrime të tjera politike.

Po ashtu, Stavileci bëri të ditur se gjatë mbrëmjes, kandidati i PDK-së për Kryeministër, Bedri Hamza, do të mbajë një tjetër konferencë për të ndarë reflektimet dhe vizionin e partisë për hapat e mëtejshëm.