Pas zhvillimeve të fundit politike dhe hetimeve të SPAK ndaj Kryetarit të Bashkisë së Tiranës, Erion Veliaj, Partia Lëvizja “Shqipëria Bëhet” dhe Nisma “Thurje” kanë vendosur të organizojnë një protestë kombëtare.

Protesta do të mbahet nesër, në orën 18:00, përpara Kryeministrisë, ku qytetarët dhe përfaqësues të shoqërisë civile do të kërkojnë dorëheqjen e Kryeministrit Edi Rama.

Organizatorët theksojnë se situata aktuale e qeverisjes ka arritur një pikë kritike dhe se qytetarët duhet të ngrihen kundër korrupsionit dhe abuzimit me pushtetin.

“Arrestimet dhe hetimet që po zhvillon SPAK tregojnë qartë se është koha për ndryshim. Shqipëria nuk mund të qeveriset më nga një regjim i bazuar në korrupsion dhe kapjen e shtetit”, thuhet në deklaratën e përbashkët të Lëvizjes “Shqipëria Bëhet” dhe Nismës “Thurje”.

Pritet që në protestë të marrin pjesë qytetarë nga e gjithë Shqipëria, të cilët janë të ftuar të bashkohen në këtë thirrje për përgjegjësi dhe transparencë.