Një operacion i përbashkët mes autoriteteve shqiptare dhe italiane ka çuar në sekuestrimin e 172 kg kokaine dhe arrestimin e tre shqiptarëve në Itali.

Sipas burimeve të policisë italiane, operacioni nisi pas sinjalizimit nga autoritetet shqiptare, të cilat vunë në vëzhgim një automjet Renault Captur, me dy shqiptarë në bord, të dyshuar se kishin hyrë në Itali për të marrë në dorëzim një ngarkesë droge. Automjeti u lokalizua fillimisht në Trieste dhe më pas u ndoq deri në Emilia Romagna, ku ndodhi edhe ndërhyrja e forcave të rendit.

Në një zonë industriale në Rubiera, automjeti shqiptar u takua me një kamion, shoferi i të cilit i dorëzoi një pako të madhe. Në këtë moment ndërhyri policia, duke arrestuar tre shqiptarët – dy pasagjerët e makinës dhe shoferin e kamionit.

Gjatë kontrollit në dy automjetet, u gjetën dhe sekuestruan 172 kg kokainë, e ndarë si më poshtë:

156 kg kokainë të fshehura në kamion

16.35 kg kokainë në automjetin që kishte ardhur nga Shqipëria

Të tre personat janë arrestuar dhe ndaj tyre është lëshuar urdhër burgimi, ndërsa autoritetet kanë nisur hetimet për të identifikuar burimin e drogës dhe rrjetin e bashkëpunëtorëve.