Një aktivitet sizmik i paprecedentë ka tronditur ishullin e njohur grek Santorini, ku brenda një jave janë regjistruar mbi 7 mijë lëkundje tërmeti. Më i fundit, me magnitudë 5.3 Rihter, goditi ishullin të hënën në mbrëmje, duke rritur panikun mes banorëve dhe turistëve.

Lëkundjet më të fuqishme u ndjenë më 6 shkurt, duke u përhapur deri në Kretë, Athinë dhe disa pjesë të Turqisë. Për shkak të situatës, mbi 10 mijë persona janë larguar nga ishulli, ndërsa shkollat dhe institucionet publike janë mbyllur.

Ekspertët: “Nuk ka lidhje me aktivitetin vullkanik”

Kreu i Organizmit për Planifikimin dhe Mbrojtjen nga Tërmeti e ka cilësuar këtë situatë si një fenomen të pashembullt, duke theksuar se deri tani nuk ka prova që ky aktivitet lidhet me proceset vullkanike të ishullit.

Aktualisht, një ekip shkencor po analizon të dhënat nga sizmografët tokësorë dhe nënujorë për të përcaktuar shkakun e këtij aktiviteti të dendur. Po ashtu, janë instaluar 8 sizmografë të rinj rreth vullkanit nënujor të Kolumbos, në përpjekje për të kuptuar nëse lëkundjet kanë natyrë vullkanike apo tektonike.

Turizmi në rrezik? Autoritetet shpallin gjendjen e jashtëzakonshme

Autoritetet kanë shpallur gjendjen e jashtëzakonshme në Santorini, ndërsa ekipet e emergjencës janë në gatishmëri të plotë. Ekspertët do të vlerësojnë nëse rreziku do të ndikojë sezonin turistik, pasi strukturat pranë Kalderës, zona më turistike e ishullit, janë më të ekspozuara ndaj pasojave të mundshme.

Megjithëse deri tani nuk raportohen dëme serioze, shkencëtarët po punojnë intensivisht për të kuptuar se sa do të zgjasë ky aktivitet dhe çfarë masash duhen marrë për sigurinë e banorëve dhe vizitorëve.