Zbardhen detaje të reja nga vendimi i Gjykatës së Posaçme Kundër Korrupsionit dhe Krimit të Organizuar (GjKKO) në lidhje me hetimet mbi kryetarin e Bashkisë së Tiranës, Erion Veliaj, dhe bashkëshorten e tij, Ajola Xoxa.
Sipas vendimit, Veliaj ka gënjyer gjatë marrjes në pyetje nga prokurorët dhe oficerët e Byrosë Kombëtare të Hetimit (BKH), duke deklaruar se nuk kishte dijeni për aktivitetet e bashkëshortes së tij.
Megjithatë, komunikimet e zbardhura gjatë hetimeve tregojnë të kundërtën. Dokumentet e siguruara nga hetuesit konfirmojnë se Veliaj jo vetëm që kishte dijeni për aktivitetet e Ajola Xoxës, por edhe e kishte ndihmuar atë.
Ky zhvillim vjen mes akuzave për lidhje të mundshme korruptive dhe fshehje të pasurisë nga zyrtarë të lartë të Bashkisë së Tiranës. Për momentin, Veliaj ende nuk ka dhënë një reagim zyrtar lidhur me këto gjetje.
