Kryebashkiaku i Tiranës, Erion Veliaj, do të dalë mëngjesin e sotëm para Gjykatës së Posaçme kundër Korrupsionit dhe Krimit të Organizuar (GJKKO), ku do të zhvillohet seanca për vlerësimin e masës së sigurisë. Seanca do të nisë në orën 08:30, ndërsa Veliaj u arrestua mesditën e së hënës me urdhër të SPAK.

Gjyqtari që do të shqyrtojë çështjen është Erjon Bani, një emër i njohur në sistemin gjyqësor, i cili më herët ka shpallur të pafajshëm Veliajn në dy raste të ndryshme. Vendimet e mëparshme të Banit kanë ardhur pas padive të ngritura nga ish-deputetja e PD-së, Grida Duma, dhe deputetja demokrate Jorida Tabaku.

Arrestimi i Veliajt ka shkaktuar debate të forta politike, ndërsa pritet që vendimi i sotëm i GJKKO-së të ketë një ndikim të rëndësishëm në zhvillimet politike dhe institucionale në vend. Përpara gjykatës janë mbledhur qindra mbështetës të Veliajt, ndërsa forcat e sigurisë vijojnë të monitorojnë situatën për të shmangur incidente të mundshme.