Shefja e diplomacisë së Bashkimit Evropian, Kaja Kallas, ka deklaruar të enjten se ka dëgjuar kritika mbi formatin aktual të dialogut mes Kosovës dhe Serbisë dhe ka premtuar shqyrtimin e mundësive për ta bërë atë më funksional.

Unë vërtet dua të shikoj se si mund ta bëjmë këtë funksional. E kam adresuar këtë edhe me ministrin e Jashtëm të Serbisë, i cili më ka thënë se është i gatshëm të investojë kohë në normalizimin e marrëdhënieve”, tha Kallas në një bisedë me grupin “Redaksia Evropiane”.

Ndryshime të reja në ndërmjetësim
Kallas ka njoftuar se do të ulet në mars me të dërguarin e ri të BE-së për dialogun, Peter Sørensen, për të përcaktuar qasjen e re.

Marrëveshja e 2023 mbetet e pazbatuar
Pavarësisht se Kosova dhe Serbia arritën një Marrëveshje për normalizim në fillim të vitit 2023, e cila konsiderohet ligjërisht e detyrueshme, blloku evropian i ka akuzuar të dyja palët për moszbatim të saj.

Kritika për Lajçakun
Në të kaluarën, liderët e Kosovës, përfshirë presidenten Vjosa Osmani dhe kryeministrin Albin Kurti, kanë akuzuar ish-emisarin e BE-së, Mirosllav Lajçak, për anësi ndaj Serbisë dhe një qasje të pabalancuar në dialog.

Me këtë qasje të re, mbetet për t’u parë nëse BE-ja do të sjellë një dinamikë të re në dialogun mes Kosovës dhe Serbisë, i cili ka ngecur prej vitesh.