Pogradec – Policia e Shtetit ka finalizuar me sukses operacionin policor të koduar “Operacionalja 27”, duke arrestuar provizorisht një 43-vjeçar të shpallur në kërkim ndërkombëtar nga autoritetet italiane.

Në sajë të shkëmbimit të informacionit dhe bashkëpunimit me homologët italianë, shërbimet e Drejtorisë së Forcës së Posaçme Operacionale (Fast Albania) lokalizuan dhe kapën në qytetin e Pogradecit shtetasin 43-vjeçar, banues në Durrës.

Ky shtetas ishte në kërkim nga Gjykata e Romës, e cila në vitin 2016 kishte caktuar ndaj tij masën e sigurisë “Arrest me burg” për veprat penale “Organizatë kriminale” dhe “Trafikimi i narkotikëve”, sipas Kodit Penal të Italisë.

Interpol Tirana është në koordinim me Interpol Romën për finalizimin e procedurave të ekstradimit të këtij shtetasi drejt Italisë.

Policia e Shtetit vijon operacionet për kapjen e personave të shpallur në kërkim ndërkombëtar, duke forcuar bashkëpunimin me partnerët ndërkombëtarë për luftën kundër krimit të organizuar.