Në kuadër të operacionit policor të koduar “Theft network”, janë arrestuar katër shtetas dhe është shpallur në kërkim një tjetër person, të cilët dyshohen për vjedhje të automjeteve, mjeteve lundruese, banesave dhe tabakino. Ky grup ka vepruar në qarkun e Durrësit dhe Tiranës.
Policia ka finalizuar operacionin, pas informacionit të siguruar në rrugë operative, duke goditur veprimtarinë kriminale të kryer nga ky grup. Gjatë operacionit, janë zbardhur dhe dokumentuar 4 vjedhje në Sukth, fshatin Bilalas dhe Mullet në Tiranë. Po ashtu, ka nisur puna për hetimin e disa vjedhjeve të tjera që dyshohet se janë kryer nga ky grup.
Shtetasit e arrestuar janë:
- D.S., 26 vjeç, banues në Marikaj
- D.M., 18 vjeç, banues në Shkodër
- E.M., 38 vjeç, banues në Mamurras
- A.L., 48 vjeç, banues në Mamurras
Po ashtu, është shpallur në kërkim shtetasi E.Z., 49 vjeç, banues në Tiranë.
Në kuadër të operacionit janë sekuestruar një mjet lundrues, një automjet kamionçinë, rrobat e përdorura nga personat e dyshuar gjatë vjedhjes së tabakinos së shtetasit R.V., si dhe katër aparate celularë.
Autoritetet vazhdojnë hetimet për dokumentimin e vjedhjeve të tjera të kryera nga ky grup, dhe materialet procedurale i kaluan Prokurorisë pranë Gjykatës së Shkallës së Parë Durrës, për veprën penale “Vjedhja e kryer në bashkëpunim”.
Të tjera veprime janë në vazhdim për kapjen e shtetasit të shpallur në kërkim.
