Kreu i Partisë Demokratike, Sali Berisha, ka reaguar pas mesazhit të dërguar nga zv.presidenti i SHBA, JD Vance, në Konferencën e Sigurisë në Mynih. Sipas Berishës, mesazhi i Vance, i cili theksoi se “nuk mund të fitoni duke censuruar kundërshtarët, duke arrestuar oponentët tuaj apo liderin e opozitës,” ishte një mesazh i drejtpërdrejtë për kryeministrin Edi Rama.

Në fjalën e tij gjatë prezantimit të programit ekonomik të PD, Berisha shtoi se Rama është kryeministri që ka arrestuar tre liderë të opozitës dhe që tani synon të mbyllë TikTok-un për të ndaluar kritikat nga të rinjtë. Berisha theksoi se mesazhi i dërguar nga SHBA nuk ishte vetëm për Shqipërinë, por një paralajmërim për ata që sulmojnë lirinë dhe vlerat demokratike.

“Atë mesazh të presidentit Trump e solli më të qartë në konferencën e sigurisë në Mynih zv. presidenti i SHBA-ve, i cili u shpreh se për ju rreziku më kryesor nuk është kina dhe Rusia, por e keni brenda jush, e keni në qëndrimin ndaj lirisë, vlerave dhe ky ishte një paralajmërim i ndershëm dhe shumë i fortë.

Nëse nuk na bashkojnë vlerat, secili në punën e vet.

Sa jetike dhe vendimtare për paqen në Evropë është prania e SHBA. por sa e rëndësishme për SHBA dhe Evropën është mbrojtja e vlerave të lirisë dhe njerëzve të lirë.

Parmbrëmë në Mynih, nëse kishte një njeri që në mënyrën më konkrete i takonin pikë për pikë ato për të cilat foli JD Vance, ishte Edi Rama.

Ai ishte aty si kryeministri që ka arrestuar tre lider të opozitës. Ai ishte aty si censori do të mbyllë tik tok se nuk duron dot kritikat e të rinjve”, tha Berisha.