Prishtinë – Presidentja e Kosovës, Vjosa Osmani, dhe kryeministri Albin Kurti morën pjesë në ceremoninë e ngritjes së flamurit me rastin e 17-vjetorit të shpalljes së Pavarësisë së Kosovës.

Të dy liderët uruan qytetarët për këtë ditë të rëndësishme, duke theksuar rrugëtimin e Kosovës drejt forcimit të demokracisë dhe zhvillimit të vendit.

Ceremonia u mbajt në sheshin “Ibrahim Rugova” në Prishtinë, ku përfaqësues të institucioneve shtetërore dhe qytetarë të shumtë festuan përvjetorin e shpalljes së pavarësisë më 17 shkurt 2008.

Në fjalën e saj, presidentja Osmani e cilësoi këtë ditë si një moment krenarie për të gjithë qytetarët e Kosovës dhe theksoi rëndësinë e forcimit të institucioneve dhe partneriteteve ndërkombëtare. Nga ana tjetër, kryeministri Kurti nënvizoi rrugën e shtetit drejt integrimeve euroatlantike dhe përpjekjet për të ndërtuar një të ardhme më të sigurt për qytetarët.

Përvjetori i Pavarësisë po shënohet me një sërë aktivitetesh shtetërore dhe kulturore në të gjithë vendin.