Në vijim të hetimeve për procedimin penal të nisur më 8 shkurt 2025, Agjencia e Mbikëqyrjes Policore (Rajoni Durrës-Kavajë) në bashkëpunim me DVP Durrës ka arrestuar shtetasin Drilon Malluta, i shpallur në kërkim për veprat penale “Vjedhje e kryer në bashkëpunim” dhe “Korrupsion Aktiv i Personit që ushtron funksione publike”.
Sipas hetimeve, më 27 janar 2025, Malluta, në bashkëpunim me shtetasin J. K., i ka dhënë ryshfet prej 10,000 eurosh punonjësit të policisë A. M., i cili ishte përgjegjës për ruajtjen e anijes “AYA ZANOYBYA”, e sekuestruar për kontrabandë nafte. Pas kësaj, ata kanë vjedhur një sasi të konsiderueshme të naftës nga depozitat e anijes.
Agjencia e Mbikëqyrjes Policore rithekson përkushtimin e saj për garantimin e zbatimit të ligjit dhe u bën thirrje qytetarëve të denoncojnë çdo rast abuzimi apo shkeljeje nga punonjësit e strukturave mbikëqyrëse, duke telefonuar në numrin e gjelbër **0800 9090** ose përmes email-it në **ankesa@amp.gov.al**.
