Një ngjarje tronditëse ka ndodhur në Shkodër, ku Anila Ndoka Prendushi, 44 vjeçe, është plagosur rëndë në kokë nga bashkëjetuesi i saj, Kolë Manaj, 34 vjeç. Sipas informacioneve paraprake, Anila është qëlluar me armë në kokë dhe ndodhet në gjendje kritike për jetën, duke marrë trajtim në reanimacionin e Spitalit të Shkodrës.

Anila, nënë e tre fëmijëve dhe e divorcuar prej 6 vitesh, ka nisur bashkëjetesën me Kolën, një djalë 10 vite më të ri, me të cilin kishte qëndruar për 5 vjet. Lidhja e tyre, megjithatë, ka përfunduar në një tragjedi të tmerrshme, ku motive për krimin ende nuk janë zbardhur. Ngjarja ka ndodhur në brendësi të automjetit tip ‘Tiguan’ të cilin e kishte në pronësi Anila.

Nga hetimet paraprake, është konfirmuar se automjeti nuk ka dëmtime të jashtme nga armë zjarri, por në brendësi të tij është gjetur një pistoletë. Aktualisht, grupi hetimor është duke punuar për të zbardhur rrethanat e ngjarjes, ndërsa Kolë Manaj ka humbur jetën në vendin e ngjarjes.

Anila Ndoka Prendushi punon si edukatore dhe ka shkaktuar shqetësim të madh në komunitetin lokal, pasi ngjarja është e papritur dhe ka ndodhur në kushte që ende nuk janë të qarta. Policia e Shkodrës vazhdon hetimet për të kuptuar më shumë rreth motivit që ka çuar në këtë krim të rëndë.