Këngëtarja Cassie ka ndarë me ndjekësit e saj në Instagram një lajm të bukur: ajo dhe bashkëshorti i saj, Alex Fine, janë në pritje të fëmijës së tyre të tretë. 38-vjeçarja publikoi një foto të ëmbël, ku shfaqet me barkun e rrumbullakosur, së bashku me dy vajzat e saj, Frankie (4 vjeç) dhe Sunny (2 vjeç).

Cassie dhe Alex u martuan në një ceremoni private në gusht 2019, ndërsa u bënë prindër vetëm dy muaj pas dasmës së tyre. Lajmi për shtatzëninë e saj ka emocionuar fansat, të cilët e kanë uruar për këtë kapitull të ri në jetën e saj familjare.

Ndërkohë, Cassie u përfshi në skandalin e fundit që tronditi industrinë muzikore, kur në media doli një video ku ajo dhunohej nga ish-partneri i saj, Diddy. Pamjet shokuese të publikuara disa muaj më parë e kanë vënë artistin në qendër të kritikave dhe akuzave të rënda për dhunë dhe abuzim.

Pavarësisht sfidave të së kaluarës, Cassie duket më e lumtur se kurrë, duke u fokusuar te familja dhe fëmijët e saj.