Avokatja dhe anëtarja e Kryesisë së Partisë Demokratike, Adriana Kalaja, ka bërë një deklaratë të fortë, duke akuzuar bashkëshorten e kryetarit të arrestuar të Bashkisë së Tiranës, Erion Veliaj, Ajola Xoxa, për prishje provash dhe intimidim dëshmitarësh.

Sipas Kalasë, ka prova dhe dëshmi që tregojnë se persona të paidentifikuar kanë hyrë në një banesë në rrugën “Brigada e Tetë”, në datat 17 dhe 18 shkurt, në orët e vona të natës. “Në hyrjen nr.3, Ap.31, persona të paidentifikuar nga banorët e këtij pallati, janë futur në orën 2 dhe 3 të mëngjesit, duke bërë zhurmë dhe duke zhvendosur pajisje, dokumente dhe çdo gjë tjetër”, tha ajo.

Kalaja kërkon që prokurorët e SPAK, Altin Dumani dhe Olsi Dado, të ndërmarrin masa për shtrëngimin e masës së sigurimit personal ndaj Ajola Xoxës, duke argumentuar se ajo po përpiqet të ndikojë në procesin hetimor.

Këto akuza vijnë në një moment kur hetimet për çështjen e Veliajt dhe aferave të dyshuara korruptive në Bashkinë e Tiranës po thellohen, ndërsa SPAK vijon punën për të zbardhur të gjitha detajet.