Shkodër – Ditën e sotme, me urdhër të Prokurorisë së Posaçme (SPAK), është arrestuar Safet Bajri në banesën e tij në Dobraç. Ai është shoqëruar drejt Tiranës nga Forcat Speciale të RENEA-s, ndërsa pritet të merret në pyetje në lidhje me vrasjen e Fatbardh Licit në vitin 2018.
Fatbardh Lici u ekzekutua në datën 10 gusht 2018 në lagjen Kiras, teksa ndodhej në një lokal duke konsumuar kafe. 53-vjeçari ishte kunati i Lulzim Kullës, një tjetër emër i njohur në Shkodër.
Vetë Bajri, i njohur ndryshe si “i forti i Dobraçit”, ka folur publikisht dy netë më parë në një emision televiziv, ku u pyet mbi kontrollet e RENEA-s në banesën e tij. Ai deklaroi se sa herë që forcat speciale kanë kryer kontrolle në shtëpinë e tij, ai ka vënë në dispozicion pamjet e kamerave të sigurisë.
Gjithashtu, Bajri foli për konfliktin me familjen Lici, duke mohuar çdo përfshirje. “Në lidhje me masakrën e Dobraçit, unë ua kam dhënë kamerat. Unë me atë familje nuk kam pasur kurrë asnjë problem. Njerëzit mund të kenë inat pse unë kam shok x apo y… Unë Asmer Bilalin e kam shok dhe nuk e mohoj. Kurrë në jetë nuk i kam ndërhyrë në probleme dhe as nuk e lejoj të më ndërhyjë në problemet e mia”, u shpreh ai.
Ndërkohë, autoritetet vijojnë hetimet për të zbardhur të gjitha rrethanat e kësaj ngjarjeje, ndërsa Bajri pritet të dalë përpara drejtësisë në ditët në vijim.
