Bashkimi Evropian ka vendosur të pezullojë sanksionet ndaj sistemit bankar të Sirisë, sektorëve të energjisë dhe transportit, duke shënuar një lëvizje të papritur në politikën ndaj këtij vendi. Sipas burimeve diplomatike, ky vendim synon të ndihmojë në rindërtimin e shtetit pas largimit nga pushteti të Bashar al-Assadit.

Sundimtarët e rinj në Damask kanë kërkuar që Perëndimi të lehtësojë sanksionet që u vendosën gjatë luftës civile siriane, me qëllim rikuperimin ekonomik të vendit. Megjithatë, BE-ja dhe fuqitë e tjera ndërkombëtare kanë qenë të kujdesshme, duke kërkuar garanci nga qeveria e re për një tranzicion gjithëpërfshirës dhe respektimin e të drejtave të minoriteteve.

Vendimi për pezullimin e sanksioneve pritet të marrë miratimin zyrtar gjatë takimit të ministrave të Jashtëm të BE-së në Bruksel. Sipas diplomatëve, këto masa mund të rikthehen nëse autoritetet e reja siriane nuk përmbushin premtimet e tyre për reforma demokratike dhe mbrojtjen e të drejtave të qytetarëve.

Një raport i Kombeve të Bashkuara ka paralajmëruar se, me ritmet aktuale të rimëkëmbjes, Sirisë mund t’i duhen mbi 50 vjet për të arritur nivelin ekonomik që kishte para luftës civile. Infrastruktura dhe ekonomia e vendit janë shkatërruar nga vite të tëra konflikti dhe izolimi ndërkombëtar, pas represionit të Assadit ndaj opozitës në vitin 2011, i cili çoi në një luftë shkatërrimtare.

BE-ja dhe aktorë të tjerë globalë po kërkojnë të ruajnë ndikimin e tyre në Siri pas largimit të Assadit, i cili për një kohë të gjatë kishte mbështetjen e Rusisë dhe Iranit.