Një ngjarje tragjike ka tronditur Parisin, ku një foshnjë e porsalindur humbi jetën pas hedhjes nga dritarja e një hoteli nga nëna e saj, një turiste amerikane 18-vjeçare. Sipas policisë lokale, ngjarja ka ndodhur pak çaste pasi nëna lindi foshnjën në dhomën e hotelit, në të cilën ajo po qëndronte me një grup të rinjsh që udhëtonin në Evropë.

Autoritetet dyshojnë se nëna e ka hedhur foshnjën nga kati i dytë i hotelit, ndërkohë që kishte ende të lidhur kordonin e kërthizës. Shërbimet e urgjencës mbërritën menjëherë në vendngjarje dhe transportuan foshnjën në spital, por, fatkeqësisht, fëmija nuk mundi të mbijetonte për shkak të plagëve të rënda që kishte marrë.

Prokuroria e Parisit ka nisur një hetim për “vrasjen e një të mituri nën 15 vjeç”, ndërkohë që nëna është dërguar në spital për të marrë ndihmën mjekësore pas lindjes. Ky rast ka tronditur jo vetëm autoritetet, por edhe opinionin publik, duke ngritur pyetje rreth shkaqeve dhe rrethanave që mund të kenë çuar në këtë akt tragjik.