Një debat i fortë u zhvillua mes konkurrentes së “Big Brother VIP 4”, Rozana Rada, dhe opinionistes Neda Balluku, pas publikimit të disa statuseve të vjetra të Rozanës për Nedën, kur kjo e fundit ishte banore në “Big Brother 4” në vitin 2011.

Në një prej statusve, Rozana shkruante: “Mbajeni Nedën larg nga rrugët kryesore kur të dalë se do ta shtyp me makinë”, çka u cilësua nga Neda si një nga komentet më të rënda që ka lexuar për veten.

Gjatë spektaklit, Neda deklaroi se nuk ishte në dijeni të këtyre statuseve deri të shtunën e kaluar dhe se nuk ka pasur asnjë inat personal me Rozanën. Ajo theksoi se pozicioni i saj si opinioniste e detyron të mbajë qëndrime të forta, por nuk ka qëlluar asnjëherë të jetë e njëanshme.

Nga ana tjetër, Rozana kërkoi falje publikisht për statusin e bërë vite më parë, duke theksuar se nuk do të bënte kurrë diçka të tillë në të tashmen.

“Unë mund ta kem bërë atë status, por nuk kisha as makinë në atë kohë. Neda është e shëndoshë e mirë, nuk i është prekur asnjë fije floku. Nëse e kam fyer me atë që kam shkruar, publikisht i kërkoj falje”, u shpreh Rozana.

Ndërkohë, Neda e konsideroi gjuhën e dhunshme të përdorur në të kaluarën si të papranueshme edhe në kontekstin e kohës kur ishte shkruar.

“Gjuha e dhunës nuk mund të minimizohet. Në 2011 mund të ishte normale, por në 2025 nuk është dhe nuk duhet të jetë”, përfundoi ajo.