Finalistja e edicionit të tretë të Big Brother VIP Kosova, Xheneta Fetahu, ka reaguar ndaj lajmeve që qarkulluan në mediat rozë, të cilat aludonin për një lidhje të saj me një person të panjohur, duke pretenduar se çifti po kalonte kohë së bashku në Dubai.

Në një postim në InstaStory, Xheneta e ka mohuar kategorikisht këtë informacion, duke shprehur pakënaqësinë e saj për spekulimet që, sipas saj, janë të pavërteta dhe të motivuara nga dëshira për klikime.

“Jam e vetëdijshme që emri im mund të jetë tërheqës për portale që kërkojnë klikime, por kjo nuk justifikon në asnjë mënyrë publikimin e lajmeve të pavërteta. Deri më tani kam zgjedhur të mos reagoj publikisht, por nga ky moment e në vazhdim, çdo shpifje dhe keqinformim mediatik do të ndiqet penalisht dhe do të adresohet përmes institucioneve ligjore përkatëse”, shkroi ajo.

Me këtë reagim, Xheneta ka lënë të kuptohet se nuk do të tolerojë më keqinformime në lidhje me jetën e saj private, duke paralajmëruar masa ligjore ndaj portaleve që shpërndajnë lajme të rreme.