Një 31-vjeçar është arrestuar nga Policia e Tiranës, pasi ka kundërshtuar dhe goditur punonjësin e Policisë Rrugore, gjatë detyrës. Ngjarja ka ndodhur më 18.03.2025, te rrethrrotullimi i Unazës së Re, në rrugën “Sotir Caci”.

Punonjësi i Policisë Rrugore, i cili ishte i planifikuar në shërbim, ka bërë shenjë ndalimi për një automjet, pasi ka vërejtur lëvizje të pakontrolluara në rrugë. Megjithatë, drejtuesi i automjetit nuk i është bindur urdhrit dhe ka vazhduar lëvizjen.

Drejtuesi i automjetit ka tërhequr punonjësin e Policisë për disa metra, duke i rrezikuar jetën. Pas kësaj, punonjësi ka ndjekur dhe ndaluar automjetin, ku ka kërkuar dokumentacionin. Shtetasi në fjalë e ka kundërshtuar dhe e ka goditur punonjësin, duke i shkaktuar dëmtime fizike.

Pas ndalimit, shërbimet e Policisë kanë shoqëruar drejtuesin e automjetit dhe, pas përfundimit të veprimeve procedurale, specialistët e Hetimit të Krimeve në Komisariatin e Policisë Nr. 4 kanë arrestuar F. K., 31 vjeç, banues në Tiranë, në flagrancë për këtë veprimtari kriminale.