Stamboll – Kryebashkiaku i Stambollit, Ekrem Imamoglu, është arrestuar nga autoritetet turke pas një bastisjeje në banesën e tij. Ai akuzohet për korrupsion, manipulim tenderash dhe ndihmë ndaj organizatës terroriste PKK. Arrestimi ka shkaktuar reagime të forta në Turqi, ndërsa partia opozitare CHP e ka cilësuar këtë veprim si një “grusht shteti kundër vullnetit të popullit”.

Sipas mediave turke, qindra forca policore u shfaqën në shtëpinë e Imamoglut, duke e shoqëruar atë në selinë e policisë. Vetë kryebashkiaku ka deklaruar: “Po përballemi me një tirani të madhe, por nuk do të dorëzohem”.

Arrestimi i tij vjen vetëm disa javë pas nisjes së një hetimi mbi vlefshmërinë e diplomës së tij universitare, e cila u anulua nga Universiteti i Stambollit. Kjo mund të ndikojë në të ardhmen politike të Imamoglut, i cili kishte shprehur ambiciet e tij për të kandiduar për president në zgjedhjet e vitit 2028.

Ngjarja ka shkaktuar protesta në Stamboll dhe qytete të tjera, ndërsa mbështetësit e tij akuzojnë qeverinë e Erdoganit për një përpjekje të hapur për të goditur opozitën. CHP ka bërë thirrje për protesta mbarëkombëtare dhe ka paralajmëruar se ky është një sulm ndaj demokracisë në Turqi.