Me ardhjen e pranverës, do të ndodhë dhe ndryshimi i orës, ku akrepat do të lëvizin 60 minuta përpara. Në natën mes të shtunës dhe të dielës, më 30 mars, do të kthehet ora e verës.

Ndryshimi do të bëhet në orën 02:00, kur akrepat do të kalojnë direkt në 03:00. Ky ndryshim sjell përfitime, pasi në këmbim të një ore më pak gjumë, do të kemi një orë dritë më shumë. Kështu, ora e verës do të “dhurojë” më shumë dritë në mbrëmje dhe më shumë orë me diell gjatë ditës.

Në këtë mënyrë, e gjithë Europa kalon në orën e verës për të optimizuar përdorimin e rrezeve të diellit, duke ndihmuar në uljen e konsumit të energjisë elektrike.

Ora verore do të zgjasë deri në fund të tetorit, kur do të kthehet ora diellore. Ky ndryshim është një proces i unifikuar në të gjithë Evropën dhe u vendos si ligj evropian që në vitin 1981.