Mijëra qytetarë janë grumbulluar para Gjykatës së Lartë në Stamboll për të mbështetur kryebashkiakun Ekrem Imamoglu, i cili ka kaluar katër ditë në paraburgim. Radhët e qytetarëve kanë arritur deri në 15 kilometra, ndërsa protestuesit kanë kërkuar lirimin e tij. Forcat e policisë kanë vendosur masa të rrepta sigurie, duke rrethuar pallatin e drejtësisë me mbi 5000 efektivë të sjellë nga rajone të ndryshme të vendit.

Imamoglu, i cili ndodhet nën hetim për akuza të rënda, përfshirë krijimin e një organizate kriminale, pastrim parash dhe lidhje me grupe terroriste, ka mohuar të gjitha akuzat, duke i cilësuar ato si shpifje. Ai pritet të dëgjojë vendimin e gjykatës, ndërsa gjasat për lirimin e tij janë të pakta.

Protestat kanë shpërthyer në disa qytete të mëdha të Turqisë, me mbi 380 persona të arrestuar deri tani. Opinioni publik, veçanërisht në Stamboll dhe qytetet kryesore të vendit, është thellësisht i tronditur nga arrestimi i Imamoglu. Nëse dënimi i tij zyrtarizohet, reagimet e publikut mund të intensifikohen edhe më tej, duke shkaktuar pasiguri dhe tensione të mëdha në shtetin turk.