Durrës – Policia Kufitare e Portit të Durrësit ka arrestuar dy drejtues autobusi pasi tentuan të fusnin në Shqipëri mallra të kontrabanduara me vlerë të përafërt 50,000 euro. Gjatë kontrollit të detajuar të mjetit, janë gjetur veshje, pajisje, produkte ushqimore, kozmetike dhe pije alkoolike, të cilat dyshohet të jenë kontrabanduar pasi nuk kishin fatura blerjeje.

Edmond Nikolli, 46 vjeç, nga Lezha, dhe Shkëlqim Çuni, 51 vjeç, nga Shkodra, akuzohen për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës” dhe “Kontrabanda me mallra të tjera”, kryer në bashkëpunim.

Në vijim të operacionit “Duo”, policia sekuestruan mallrat, autobusin, celularët dhe pasaportat e të arrestuarve. Materialet procedurale iu referuan Prokurorisë së Durrësit për veprime të mëtejshme.