Bella Bautista, e cila mbante titullin “Miss Buckhead 2025”, ka vendosur të tërhiqet nga gara për “Miss Georgia USA”, duke hequr dorë nga mundësia për t’u bërë konkurrentja e parë transgjinore në këtë konkurs bukurie.

Në një deklaratë të bërë publike në Instagram, 22-vjeçarja, studente e ekonomisë dhe historisë, njoftoi vendimin e saj për të kthyer kurorën, duke theksuar se organizata nuk përputhej më me vlerat e saj.

“Me zemër të rënduar, zyrtarisht heq dorë nga titulli. Kur aplikova për këtë konkurs, e bëra me shpresën se do të thyeja barrierat, do të frymëzoja të tjerët dhe do të tregoja se përfaqësimi është i rëndësishëm. Megjithatë, pas një reflektimi të thellë, arrita në përfundimin se lidhjet dhe veprimet e organizatës nuk përputhen më me vlerat e mia personale dhe misionin tim për përfshirjen dhe një botë pa diskriminim”, shkroi ajo.

Bautista u shpreh se ishte inspiruar për të marrë pjesë në konkurs pas pranisë së dy konkurrenteve transgjinore në Miss Universe 2023, ku Miss Portugalia arriti të kualifikohej në Top 20.

Një nga arsyet kryesore që e shtynë të tërhiqej ishte mbështetja politike e Kim Greenwood, drejtoresha e Greenwood Productions, për presidentin Donald Trump. “Pasi u regjistrova, fillova të vërej publikimet në faqen e saj që mbështesnin Trump-in dhe kjo filloi të shkaktonte shqetësim. Si një person transgjinor, veçanërisht në Gjeorgji, një shtet shumë konservator, nuk dija çfarë më priste”, shpjegoi ajo.

Megjithatë, Bautista është e vendosur të vazhdojë përpjekjet e saj për përfaqësim dhe përfshirje në botën e konkurseve të bukurisë. “Udhëtimi im nuk ka mbaruar, mendoj se tani fillon vërtet. Shpresoj që një ditë të jetoj në një vend ku identiteti im trans nuk do të kategorizohet nga asnjë anë politike dhe nuk do të shfrytëzohet si një mjet politik”, përfundoi ajo.