Pas linjës së saj të jetës, Rozana Radi u ftua në “Storm Arena”, ku përjetoi një nga momentet më emocionuese të këtij edicioni të Big Brother VIP. Ajo u surprizua me një letër prekëse nga partneri i saj, e cila u lexua nga moderatori Ledion Liço.

“Ti më mund bindshëm me fjalën, por sot më takon mua të shkruaj. Po e përmbledh shkurt që të limitoj sa më shumë dëmet. Mos të të shkruaja, i binte që të të braktisja tani që je mirë. Çfarë ke bërë, s’ke pasur nevojë të pyesësh njeri. Ti e di përgjigjen më mirë se çdo kush. Ne e kemi mbështetur pa kushte njëri-tjetrin. Shënim: Shihemi pas festës”, shkruhej në letrën e partnerit të saj.

E emocionuar nga mesazhi, Rozana dha një premtim të ndjerë: “Dhe unë ia premtoj që ne do bëhemi prindër, sido që të jetë”.

Por surprizat nuk përfunduan këtu. Top Channel i bëri një dhuratë të veçantë këngëtares dhe moderatores së njohur. Ledion Liço e informoi atë se televizioni do të mbështesë trajtimet e saj, duke i dhënë shpresë për ëndrrën më të madhe të jetës së saj.

“Sonte dua të të them që Top Channel do të mundësojë ty të gjithë trajtimet, në mënyrë që me shpresë të madhe, mbase që vitin tjetër, kur unë të jem duke bërë Big Brother, të më vijë një mesazh nga ty dhe do më thotë: ‘Hej, ia dolëm’”, tha Ledioni.

Ky moment solli emocione të forta, duke prekur jo vetëm Rozanën, por edhe publikun që e ndoqi nga ekrani.