Franca ka vendosur të rikthejë emigrantët që kalojnë ilegalisht Kanalin, një veprim që ministri i Brendshëm francez, Bruno Retailleau, e cilësoi si një “mesazh të qartë” për ata që planifikojnë të ndërmarrin këtë udhëtim të rrezikshëm.
Sipas raportimeve të The Times, trafikantët kanë ndryshuar taktikat e tyre për të kaluar shqiptarët në Mbretërinë e Bashkuar, veçanërisht pas marrëveshjes së vitit 2022 mes Britanisë dhe Shqipërisë, që mundëson deportimin e shpejtë të shqiptarëve që mbërrijnë me anije të vogla.
Tashmë, shqiptarët po paguajnë deri në 23,000 paund për të hyrë në Britani me kamionë, për të shmangur zbulimin nga Forca Kufitare. Statistikat tregojnë një rënie drastike të numrit të shqiptarëve që mbërrijnë me anije të vogla, nga 12,658 në vitin 2022 në vetëm 616 vitin e kaluar.
Retailleau pranoi se Franca duhet të bëjë më shumë për të ndaluar anijet, ndërsa muajin e ardhshëm do të hyjnë në fuqi ndryshime ligjore që do t’iu lejojnë forcave franceze të ndalojnë anijet në ujëra të cekëta.
Në një deklaratë të martën, ai theksoi nevojën për një marrëveshje dypalëshe mes qeverive britanike dhe franceze për kthimin e emigrantëve të kapur në Mbretërinë e Bashkuar.
“Edhe kur dikush ka kaluar Kanalin, nëse kthehet, kjo do të dërgojë një mesazh të qartë,” – u shpreh ministri francez.
Aktualisht, pothuajse të gjithë emigrantët që mbërrijnë me anije të vogla regjistrohen nga Forca Kufitare britanike, duke lehtësuar identifikimin dhe deportimin e tyre.
