Tiranë, 7 prill 2025 – Kandidati i Partisë së Lirisë për qarkun e Tiranës, Tedi Blushi, gjatë fjalës së mbajtur në prezantimin e skuadrës së PL-së për zgjedhjet parlamentare të 11 majit, lëshoi akuza të forta ndaj qeverisë Rama, duke e cilësuar “shëndetësinë falas” si një nga mashtrimet më kriminale dhe më të pabesa të këtyre 12 viteve.

“Qytetarët sot paguajnë 60% më shtrenjtë për ilaçet dhe trajtimin shëndetësor. Ky është rezultati i një mashtrimi që nuk vetëm ka shkatërruar besimin, por ka dëmtuar direkt jetën dhe xhepat e shqiptarëve”, deklaroi Blushi.

Ai e cilësoi aleancën e re opozitare “PD-Aleanca për Shqipërinë Madhështore” si një shpresë të re që do të sjellë reformë të thellë dhe të vërtetë në sektorin e shëndetësisë. Sipas tij, kjo aleancë ka një platformë të qartë:
• Dyfishim i pagave për mjekët dhe infermierët
• Rimbursim nga 50% deri në 90% i ilaçeve
• Rritje e listës së barnave të rimbursueshme
• Mbulim të plotë nga shteti për ilaçet e sëmundjeve tumorale
• Krijimi i një Instituti të Pavarur të Tumoreve, i shkëputur nga QSUT
• Anulimi i koncesioneve korruptive në shëndetësi
• Rritje e buxhetit për shëndetësinë nga 2.1% në 3% të PBB brenda mandatit të parë

“Ne nuk bëjmë premtime, ne ofrojmë zgjidhje konkrete. Do të ndërtojmë një sistem shëndetësor që nuk ndëshkon të sëmurët, por i mbron ata. Qytetarët nuk do të jenë më viktimë e koncesioneve apo interesave të klientelës politike,” përfundoi Blushi.

Deklaratat e tij u pritën me entuziazëm nga të pranishmit, ndërsa vetë Partia e Lirisë synon të jetë një faktor kyç në ndërtimin e një mazhorance të re pas 11 majit.