Në vend të festës tradicionale për Ditën e Ulqinit, qytetarët e këtij qyteti bregdetar në jug të Malit të Zi zgjodhën protestën. Me mijëra banorë dolën në rrugë për të kundërshtuar dy marrëveshjet e nënshkruara nga kryeministri i Malit të Zi, Millojko Spajiq, me Emiratet e Bashkuara Arabe, të cilat, sipas tyre, i hapin rrugën dhënies me qira për 99 vjet të Plazhit të Madh të Ulqinit, një pasuri natyrore me sipërfaqe mbi 20 milion metra katrorë, ndër plazhet më të mëdha ranore në Evropë.

Protesta u mbajt në një atmosferë të qartë qëndrimi: “Ulqini nuk është në shitje”. Me banderola në duar ku shkruhej “Larg duart nga Plazhi i Madh” dhe “Jemi për investime dhe zhvillim të qëndrueshëm, por duhet të pyetemi për fatin tonë dhe të fëmijëve tanë”, protestuesit kërkuan transparencë dhe përfshirje në vendimmarrje për projekte të kësaj përmase.

Për herë të parë pas tri dekadash pluralizëm, përfaqësues të të gjitha forcave politike lokale, deputetë, liderë partiakë dhe përfaqësues të shoqërisë civile folën me një zë: Plazhi i Madh duhet të mbrohet dhe banorët e Ulqinit duhet të pyeten.

Projekti i shumëdiskutuar, i vlerësuar në mbi 30 miliardë euro, pritet të realizohet nga biznesmeni arab Muhamed Alabar, dhe përfshin ndërtimin e objekteve turistike gjigante, një aeroporti, spitali, dy marinave, dy universiteteve dhe shumë struktura të tjera. Por ndërsa qeveria pretendon për zhvillim ekonomik dhe hapje të vendeve të reja pune, shumë zëra e kanë parë këtë si një rrezik të madh për mjedisin, identitetin lokal dhe sovranitetin ekonomik.

Kryeministri Spajiq tashmë ka nisur konsultimet politike për të siguruar miratimin e marrëveshjes në parlament. Deri tani, partia e tij “Evropa Tani” dhe partia Boshnjake janë shprehur pro, ndërsa koalicionet shqiptare kanë deklaruar qartë se nuk do ta mbështesin një marrëveshje që shkon në dëm të Ulqinit dhe banorëve të tij.

“Beteja sapo ka nisur,” deklaruan organizatorët e protestës. Ata paralajmëruan vazhdim të rezistencës, surpriza dhe kundërveprime për të penguar zbatimin e marrëveshjes, duke kërkuar që Plazhi i Madh të mbetet pasuri e përbashkët dhe jo aset i huaj përfitimi.

Ndërsa pritet vendimi përfundimtar i parlamentit, banorët e Ulqinit dhe opinioni publik mbeten me sytë nga Podgorica, në pritje të një vendimi që mund të ndryshojë përgjithmonë fytyrën e këtij qyteti bregdetar.