Çështja tragjike e vrasjes së 22-vjeçares shqiptare, Ilaria Sula, në Romë, merr një kthesë të re: sot pritet që nëna e 23-vjeçarit të arrestuar për vrasje të rëndë dhe fshehje kufome të paraqitet para gjykatës. Ajo dyshohet se ka ndihmuar djalin e saj në fshehjen e trupit të viktimës pas krimit makabër të ndodhur në banesën familjare në Via Homs, në lagjen afrikane të Romës.

Gruaja, Nors Mazlapan, e thirrur në komisariat në prani të avokatëve të saj, pritet të regjistrohet zyrtarisht si e dyshuar në hetim nga prokurorët e Piazzale Clodio. Hetuesit janë të përqendruar në rolin e saj në orët pas vrasjes, duke vlerësuar nëse ajo ka ndihmuar në fshehjen e provave apo trupit të pajetë.

Edhe pse i biri ka deklaruar në dëshminë e tij: “Gjithçka e kam bërë vetë”, hetuesit nuk përjashtojnë bashkëpunimin e nënës apo të babait në ngjarje. Analiza të hollësishme po bëhen mbi të dhënat telefonike të të dy prindërve – Nors Mazlapan dhe Rik Samson – për të verifikuar lëvizjet dhe kontaktet e tyre në kohën e vrasjes.

Burime mediatike italiane raportojnë se djali kishte rrëfyer fillimisht se i ati ndodhej në banesë në momentin e sulmit, por më vonë ky i fundit ndryshoi version, duke deklaruar se ka qenë jashtë deri të nesërmen. Në dëshminë e saj, nëna ka pohuar se nuk e ka pëlqyer marrëdhënien e të birit me Ilarian:
“Nuk doja që Marku ta sillte gjithmonë Ilarian në shtëpi. Kisha frikë se do ta shpërqendronte shumë: djali im duhet të qëndrojë i fokusuar në studimet e tij.”

Ndërkohë, mbrojtja e të dyshuarit kryesor ka kërkuar një vlerësim psikiatrik për të, duke sugjeruar se ai mund të ketë pasur probleme mendore që kanë ndikuar në aktin e rëndë.

Hetimet vazhdojnë intensivisht për të zbuluar nëse prindërit e 23-vjeçarit kanë luajtur një rol aktiv në fshehjen e trupit apo në ndonjë përpjekje për të mbuluar krimin. Në qendër të hetimeve mbetet edhe motivi, që sipas autorit lidhet me xhelozinë dhe mesazhe në aplikacionin Tinder që viktima kishte marrë nga një djalë tjetër.