Një konflikt familjar për motive pronësie ka përfunduar me përdorim armësh në fshatin Fierseman të Divjakës, mbrëmjen e djeshme, rreth orës 20:00.

Sipas njoftimit zyrtar të Policisë së Shtetit, konflikti ka ndodhur mes dy vëllezërve dhe një shtetasi tjetër. Fillimisht, pas një debati verbal, Zarif Konja, 58 vjeç, dhe A.G., 57 vjeç, kanë goditur me grushte vëllain e Zarifit, Shpëtim Konja, 50 vjeç.

I tensionuar nga situata, Shpëtim Konja ka marrë armën e gjahut, të cilën e kishte me leje dhe ka qëlluar, duke përshkallëzuar rrezikshëm përplasjen familjare.

Fatmirësisht, nga të shtënat nuk ka të lënduar, por për pasojat e veprimeve të tij, Shpëtim Konja është arrestuar në flagrancë nga policia, për veprat penale “Kanosja”, “Dhuna në familje” dhe “Shkatërrimi i pronës”.

Ndërkohë, A.G., 57 vjeç, është proceduar penalisht në gjendje të lirë, për veprën penale “Dëmtime të tjera me dashje”.

Policia njofton se hetimet po vijojnë për të zbardhur plotësisht rrethanat e ngjarjes dhe për të dokumentuar me prova ligjore të gjitha veprimet e përfshira në konflikt.