Në një deklaratë të fortë gjatë Asamblesë Parlamentare të Këshillit të Europës, deputetja e Partisë Demokratike, Albana Vokshi, ka ngritur shqetësimin për veprimet e kryeministrit Edi Rama në kontrollimin e rrjeteve sociale në Shqipëri në prag të zgjedhjeve parlamentare të 11 majit.

Vokshi e quajti këtë kontroll si një veprim autokratik që minon të drejtat themelore të qytetarëve. Ajo theksoi se përdorimi i pajisjeve speciale për monitorimin e internetit disa javë përpara zgjedhjeve është një përpjekje për të manipuluar dhe shkelur lirinë e shprehjes në vend.

Në fjalën e saj, Vokshi nënvizoi se zgjedhjet në Shqipëri nuk janë as të lira dhe as të ndershme, duke iu referuar raporteve të OSBE/ODIHR që kanë evidentuar mungesën e transparencës dhe moszbatimin e rekomandimeve ndërkombëtare. Ajo kritikoi përdorimin e aplikacioneve të tilla si “Aktivisti”, të cilat, sipas saj, janë përdorur nga Partia Socialiste për propagandë, manipulim të sjelljes së votuesve, intimidim të nëpunësve civilë dhe heshtje të kundërshtarëve politikë.

Vokshi gjithashtu bëri thirrje për një plan të koordinuar që shtrihet përtej kufijve të Bashkimit Europian për të mbrojtur vendet kandidate, duke përfshirë Shqipërinë, Moldavinë dhe Gjeorgjinë, dhe për të mbrojtur lirinë e fjalës në platformat dixhitale si TikTok, Meta dhe X.

Në përfundim, Vokshi e mbylli fjalimin e saj me një mesazh të qartë: “Demokracia fillon me zgjedhje të lira dhe të ndershme.”