Një grua është plagosur sot në fshatin Sulaj të Fierit, pas një sulm me armë zjarri. Shtetasja Suzana Merrnica, 50 vjeçe, ka marrë plagë në trup dhe ndodhet në gjendje të rëndë. Ajo po lëvizte me motor bashkë me të birin në momentin kur janë dëgjuar të shtënat.
Policia e Fierit ka bërë me dije se autorët e dyshuar të plagosjes janë Afrim Cimili dhe Ali Cimili (babë e bir), banues në fshatin Dërmënas, të cilët janë shpallur në kërkim. Ngjarja ka ndodhur rreth orës 14:00, në “Mbikalimin e Dërmënasit”, dhe ende nuk janë sqaruar të gjitha rrethanat.
Në kuadër të hetimeve, janë ngritur pika kontrolli në hyrje dhe dalje të qytetit të Fierit, si dhe janë intensivuar kontrollet në akset “Fier-Vlorë” dhe “Fier-Lushnjë”. Grupi hetimor, nën drejtimin e prokurorit, po vijon punën për zbardhjen e plotë të ngjarjes dhe kapjen e autorëve.
