Nga sheshi “Skënderbej”, ku u çel zyrtarisht fushata elektorale e Partisë Socialiste për zgjedhjet e 11 majit, drejtuesi politik i qarkut të Dibrës, Blendi Klosi, u shpreh i bindur për një fitore të PS-së në të gjithë vendin.

Në fjalën e tij para qytetarëve dhe përfaqësuesve të PS-së nga 12 qarqet, Klosi vlerësoi Partinë Socialiste si një forcë politike të madhe dhe të organizuar, që ka kaluar shumë sfida ndër vite, por që sipas tij mbetet e përkushtuar ndaj sfidës më të madhe: mirëqenies së qytetarëve.

“PS është një parti me mbi 100 mijë anëtarë, që merr 1 milion vota në veri e jug, në diasporë po ashtu, dhe që fiton sepse i ka të gjithë me vete. Partia që drejtohet nga Edi Rama, vizionari që e ka shndërruar Shqipërinë në një vend të gatshëm për të hyrë në Bashkimin Europian,” tha Klosi.

Ai e cilësoi sheshin “Skënderbej” si simbolin e transformimit të Shqipërisë Evropiane dhe kujtoi pritjen festive që i ishte bërë Ramës në Dibër, gjatë inaugurimit të rrugës së Arbrit.

“Ne jemi një parti e madhe që kemi kaluar shumë sfida, por sfida jonë më e madhe është mirëqenia e qytetarëve shqiptarë. Jam i sigurt se do të fitojmë përsëri. Qarku i Dibrës do të shndërrohet, si e gjithë Shqipëria, që do të votojë masivisht për PS-në.”

Në fund të fjalës së tij, Klosi ftoi qytetarët të votojnë PS-në dhe Edi Ramën për të siguruar përmbushjen e një premtimi kombëtar:

“Ka një lider që atë që premton, e bën. Na ka premtuar që do të jemi pjesë e BE-së brenda këtij mandati. Prandaj, të votojmë masivisht Ramën dhe PS-në.”