Durrës, 14 prill 2025 – Kryetari i Partisë Demokratike, Sali Berisha, ka zhvilluar një takim me qytetarët e Durrësit, ku prezantoi kandidatët e koalicionit “Shqipëria Madhështore”, duke e cilësuar qytetin bregdetar si pikënisjen e fitores opozitare dhe të “disfatës së parë të Edi Ramës”.

Në një fjalim të mbushur me tone të forta politike dhe emocione, Berisha shprehu mirënjohje për qytetarët e Durrësit, duke i cilësuar si “simbol i ndarjes nga e keqja” dhe “i përmbysjes së diktaturës së drogës dhe krimit”.

“Energjia, entuziazmi i shpirtit dhe zemrave tuaja përvërshon sot në të katër anët e Durrësit dhe Shqipërisë”, deklaroi Berisha, duke shtuar se “në këtë qytet nisi disfata e parë e Ramës, kur gratë e bojkotuan atë në një aktivitet që ai donte ta shiste si mbështetje masive”.

Kreu i PD-së vlerësoi në veçanti gratë që, sipas tij, refuzuan propagandën e kryeministrit, duke i cilësuar si “nëna dhe motra shqiptare që nuk pranojnë të përdoren nga një regjim që u ka larguar fëmijët dhe u ka ofruar drogën në vend të dijes”.

Në takimin e mbajtur në prani të drejtuesve politikë të qarkut si Oerd Bylykbashi dhe Genti Strazimiri, Berisha prezantoi kandidatët për zgjedhjet e ardhshme duke u shprehur: “Kurrë më parë nuk kemi pasur një ekip kaq të përkushtuar e qytetar”.

Ai theksoi se javët e fundit kanë shënuar një “mbarësi të madhe për opozitën”, duke përmendur dhe protestën në Tiranë, të cilën e quajti “mesazh të qartë për fundin e një narkodiktature”.

“Qytetarët e Tiranës ia thanë sheshin Edi Ramës. E lanë të flasë me vete në sheshin Skënderbej”, përfundoi ai.

Fushata e koalicionit opozitar pritet të vijojë me prezantime në qarqe të tjera të vendit gjatë ditëve në vijim.