Ish-banorja e Big Brother VIP Albania, Loredana Brati, ishte e ftuar këtë të mërkurë në studion e emisionit “Shqipëria Live” në Top Channel, ku foli hapur për eksperiencën e saj në shtëpinë më të famshme në vend.

E renditur mes gjysmëfinalistëve të këtij sezoni, Loredana rrëfeu se pas daljes nga formati pati një bisedë të sinqertë me prindërit e saj, të cilët kishin ndjekur nga afër gjithçka që kishte ndodhur brenda shtëpisë, përfshirë edhe intervistën e parë të Jozit pas eliminimit.

“Prindërit më thanë: ‘A nuk kishim të drejtë kur të thoshim që ishe nën hije? Pjesa jote më e bukur doli kur dole nga ajo hije!’ Dhe unë u dhashë të drejtë”, – tha Loredana, duke shtuar se nuk i hedh faj askujt tjetër për situatat që ka kaluar, përveç vetes.

Ajo u shpreh se nuk e konsideron gabim lidhjen që krijoi brenda BBVIP, pavarësisht polemikave:
“Ka ndodhur, mësova nga ajo. Edhe pse ishte e vështirë, më dha shumë emocione.”

E pyetur për reagimin e familjes pas incidentit me Jozin dhe Gjestin brenda shtëpisë, Loredana tregoi se prindërit ishin thellësisht të tronditur dhe të shqetësuar për mirëqenien e saj:
“Ishin në merak për mua. Nga tani e tutje më thanë vetëm një gjë: ‘Me mendje në kokë’.”

Rrëfimi i Loredanës erdhi mes reflektimi dhe qartësie, duke dhënë sinjalin se pas Big Brother, ajo është gati të nisë një kapitull të ri – me më shumë vetëdije dhe pjekuri emocionale.