Detaje të reja janë zbuluar në lidhje me atentatin e rëndë të ndodhur mbrëmjen e djeshme në Tiranë, ku një automjet luksoz tip G-Class u qëllua me breshëri plumbash në lëvizje.

Sipas burimeve nga hetimet, dyshohet se autorët kanë qenë tre persona të armatosur, që ndodheshin brenda një automjeti tip fuoristradë. Pas atentatit, ata janë larguar në drejtim të paditur, ndërkohë që policia nuk ka ende asnjë gjurmë konkrete për kapjen e tyre.

Hetuesit kanë nisur analizën e kamerave të sigurisë në zonë dhe janë fokusuar në identifikimin e automjetit të autorëve. Megjithatë, asnjë pistë e qartë nuk ka dalë ende në dritë, dhe një nga skenarët më të mundshëm që po shqyrtohet është ngatërrimi i shënjestrës.

Burime nga grupi hetimor bëjnë me dije se të rinjtë që ndodheshin brenda mjetit të qëlluar janë tronditur rëndë nga ngjarja dhe kanë dhënë deklarimet e para. Ata kanë mohuar të kenë pasur ndonjë konflikt, qoftë të mëparshëm apo të ditës së ngjarjes.

Gjithashtu, asnjë prej personave në automjet – përfshirë edhe shoferin – nuk ka precedent penal apo përfshirje në ngjarje kriminale, çka i jep më shumë peshë dyshimit për sulm të gabuar apo atentat të ndodhur për shkak të ngjashmërisë së makinës me një objektiv tjetër.

Ngjarja ka tronditur zonën dhe opinionin publik, ndërkohë që policia dhe prokuroria vijojnë hetimet në disa pista të ndryshme, për të zbardhur autorësinë dhe motivin e atentatit.

Në vijim pritet që autoritetet të japin një deklaratë zyrtare për progresin e hetimeve.