Transferimi i Kylian Mbappé te Real Madridi u përjetua si ngjarja më e madhe e dekadës në botën e futbollit. Pas një “telenovele” të pafund që zgjati me vite, ylli francez më në fund veshi fanellën e bardhë, i pritur me duartrokitje, entuziazëm dhe pritshmëri që flisnin për një epokë të re galaktike në “Santiago Bernabéu”.

Por realiteti sportiv është më i ftohtë se emocionet. Statistikat e Mbappé flasin për gola dhe asiste, por kur analizohen me kujdes, shumica e këtyre shifrave vijnë në ndeshje kundër kundërshtarëve modestë – Alavés, Cádiz, Getafe. Në skenat e mëdha, aty ku historia shkruhet me gjakftohtësi dhe guxim, francezi ka qenë i zbehtë, në hije, shpesh i tejkaluar nga emra si Jude Bellingham, Vinicius Jr. apo Rodrygo.

Në “El Clásico”, në netët elektrizuese të Champions League, apo ndeshjet vendimtare të La Ligës, Mbappé nuk ka qenë ai që pritej të ishte. Nuk ka qenë lideri që tërheq skuadrën përpara, nuk ka qenë vendimtar në momentet kur fanella e Realit peshon dyfish dhe gabimet nuk falen.

A është ende në proces përshtatjeje? Apo ndoshta nuk ka lënë pas mentalitetin “parizien”, ku presioni ishte më i zbutur dhe objektivat më të paqartë? Cilatdo qofshin arsyet, në Madrid nuk ka shumë vend për justifikime. Aty kërkohet lidership, personalitet dhe vendosmëri, sidomos në sfidat që ndajnë legjendat nga thjesht emrat e mëdhenj.

Florentino Pérez e solli për të udhëhequr një projekt të ri fitues, por sot, në Valdebebas, ka zëra që pyesin: a ishte kjo lëvizja e duhur? Sepse ndërsa të tjerët mbajnë skuadrën mbi supe, Mbappé ende duket se është në kërkim të momentit të tij madhor.

Askush nuk e mohon talentin, karizmën dhe potencialin e tij. Por në Madrid, vetëm kaq nuk mjafton. Është koha që Kylian Mbappé të tregojë pse erdhi: për të bërë histori, jo vetëm për të shitur fanella.