Kryeministri Edi Rama vlerësoi sot në podkastin e tij “Flasim” progresin e Shqipërisë në procesin e screening-ut me Bashkimin Europian, duke e cilësuar vendin tonë si një “surprizë të këndshme” për partnerët europianë.

I ftuar në një episod të titulluar “Katër UFO në vendin e shqiponjave”, Rama bashkëbisedoi me katër të rinj të kthyer nga emigracioni, të cilët sot mbajnë pozita të larta në administratën shtetërore: Florian Semani, zv.ministër i Financave, Blerina Abrazhda, zv.ministre e Mbrojtjes, Andi Memeti, zv.ministër i Financave dhe Erinda Aliaj, eksperte e teknologjisë në Kryeministri.

Teksa ndanin historitë personale dhe arsyet pse zgjodhën të ktheheshin në Shqipëri, Rama ndali vëmendjen te performanca e administratës publike në procesin e negociatave me BE-në, duke hedhur poshtë perceptimin se në administratë “janë të gjithë hajdutë”.

“Ka hijet e veta, po jo gjithçka është e zezë. Gjatë procesit screening janë ulur përballë 36 grupe të përbashkëta ekspertësh, ku është bërë diagnoza e plotë e shtetit shqiptar. Dhe aty kemi performuar si asnjëherë më parë,” – theksoi ai.

Kryeministri zbuloi se në fillim të procesit kishte pasur ndjesi frike dhe pasigurie, por gjërat ndryshuan shpejt, duke sjellë madje edhe vlerësime surprizuese nga liderët europianë.

“Kryeministri i Holandës më tha: ‘po dëgjoj fjalë shumë të mira për ekipin tuaj, mbresat në Bruksel janë të forta’. Kryeministri i Danimarkës: ‘Çfarë ndodh me administratën tuaj? Po shoh punë shumë të mirë’. E njëjta gjë nga Kryeministri i Spanjës,” – deklaroi Rama.

Ai theksoi se kthimi i profesionistëve të rinj nga jashtë dhe përfshirja e tyre në struktura vendimmarrëse është një nga pikat e forta të administratës së re, që po e ndihmon vendin të ecë më shpejt drejt anëtarësimit në Bashkimin Europian.