Në një ngjarje të pazakontë dhe njëkohësisht plot humor, një mace e quajtur Sophie arriti të hyjë në lëndinën veriore të Shtëpisë së Bardhë, duke sfiduar një nga perimetritë më të sigurta në botë. Kafsha gri me sy të gjelbër u bë shpejt një yll i rrjeteve sociale, ndërsa gazetarët e pranishëm nuk ngurruan të dokumentonin “vizitën e saj shtetërore”.

Mediat raportojnë se Sophie për pak kohë madje “pushtoi” edhe zyrën e informimit, aty ku zakonisht zëdhënësja e presidentit Donald Trump, Karoline Leavitt, përballet me pyetjet e gazetarëve. Një video e shpërndarë në platformën X (ish-Twitter) tregoi një gazetare duke mbajtur macen në krahë dhe duke bërë shaka se “ndoshta ajo mbante një pajisje dëgjimi të fshehur”.

Falë një AirTag-u – pajisje gjurmuese e lidhur me smartphone – pronari i Sophie-s u identifikua dhe më pas ajo u ribashkua me familjen e saj.

Ngjarja vjen pas një tjetër incidenti të çuditshëm, kur një foshnjë “rrëshqiti” përmes gardhit të hekurt të Shtëpisë së Bardhë dhe hyri në ambientet e jashtme, përpara se të kthehej te prindërit me ndihmën e forcave të sigurisë.

Këto raste tregojnë se ndonëse teknologjia dhe vigjilenca janë maksimale, herë pas here ndodhin përjashtime që e zbukurojnë me nota njerëzore atmosferën e ftohtë të një prej vendeve më të mbrojtura në botë.