Presidenti i SHBA-së, Donald Trump, ka nxitur spekulime mbi mundësinë e një kandidature të tretë për Shtëpinë e Bardhë, duke filluar të shesë kapela me mbishkrimin “Trump 2028” në faqen e tij zyrtare. Ky hap vjen pas komenteve të bëra nga Trump se ai mund të përpiqet të rikthehet në detyrë, pavarësisht ndalimeve të Kushtetutës amerikane që parashikojnë vetëm dy mandate për presidentët.

Kapelat, të cilat aludojnë për zgjedhjet presidenciale të vitit 2028, janë në shitje për 50 dollarë, duke rritur dyshimet mbi mundësinë që Trump të jetë duke përgatitur terrenin për një rikthim në politikë. Ai ka sugjeruar më parë se ka pasur kërkesa nga shumë mbështetës për një mandat të tretë, duke e lidhur këtë me pretendimet e tij për manipulime të zgjedhjeve të vitit 2020, të cilat i humbi ndaj presidentit Joe Biden.

Sipas Amendamentit të 22-të të Kushtetutës, një person nuk mund të zgjidhet në detyrën e presidentit më shumë se dy herë, por Trump ka përmendur mundësinë e përfshirjes së një kandidati tjetër për postin e presidentit në vitin 2028, siç është JD Vance, për të krijuar një mundësi që ai të shërbejë përsëri si zv/president. Kjo mund të hapte rrugën për një mandat të tretë të mundshëm për Trump nëse Vance jep dorëheqjen.

Ekspertët ligjorë janë të mendimit se çdo përpjekje për të anashkaluar Kushtetutën do të përballej me kundërshtime në gjykatë. Megjithatë, përdorimi i veshjeve “Trump 2028” ka bërë që ekspertët politik të theksojnë se kjo mund të jetë një mënyrë për Trumpin për të mbajtur të gjallë idenë e rikthimit në pushtet dhe për të ruajtur influencën e tij në politikën amerikane.

Kritikët e Trumpit e kanë interpretuar këtë veprim si një shenjë të mentalitetit të pushtetit dhe kanë kujtuar veprimet e tij pas humbjes së zgjedhjeve të 2020, të cilat kishin vënë në dyshim ndershmërinë e procesit demokratik të zgjedhjeve.