Kurti: Takimi i Patriarkut serb me Putinin, rrezik për rajonin – nuk është diplomaci fetare, por partneritet autoritar Kryeministri në detyrë i Kosovës, Albin Kurti, ka reaguar ashpër ndaj takimit të zhvilluar më 22 prill mes Patriarkut të Kishës Ortodokse Serbe, Porfirije, dhe presidentit rus Vladimir Putin në Kremlin, duke e cilësuar këtë takim si një partneritet strategjik mes regjimeve autoritare dhe jo thjesht një akt diplomacie fetare. Në një postim në platformën X, Kurti e përshkroi takimin si “shqetësues” dhe tha se Kisha Ortodokse Serbe ka luajtur historikisht një rol aktiv politik në rajon. Ai theksoi se deklaratat e Porfirije nxisin rreshtimin e Serbisë me Rusinë dhe kërcënojnë stabilitetin në Ballkan. “Patriarku bëri thirrje për një rreshtim më të gjerë gjeopolitik nën udhëheqjen ruse, duke thënë se ‘varka e vogël serbe duhet të jetë gjithmonë e lidhur pas anijes së madhe ruse’,” shkroi Kurti. Ai gjithashtu vuri në dukje se deklaratat e Porfirije vijnë pak ditë para vizitës së presidentit serb Aleksandar Vuçiç në Moskë, ku pritet të marrë pjesë më 9 maj në kremtimin e Ditës së Fitores. Kjo vizitë është kritikuar ashpër nga Bashkimi Evropian, në një kohë kur Perëndimi kërkon që vendet e rajonit të qëndrojnë larg ndikimit rus. Deklaratat e kreut të Kishës Ortodokse Serbe, se qëndrimi i Serbisë ndaj Kosovës, Bosnje e Hercegovinës dhe Malit të Zi varet nga pozicioni global i Rusisë, janë cilësuar ndërhyrje të papranueshme dhe destabilizuese. Ministrja në detyrë e Punëve të Jashtme të Kosovës, Donika Gërvalla, e quajti retorikën e Porfirije “cenim të sovranitetit” të Kosovës dhe “nxitje përçarjeje në rajon”. Reagime të ashpra kanë ardhur edhe nga Mali i Zi, ku deklaratat janë cilësuar si të papërshtatshme dhe të rrezikshme për paqen në Ballkan.