Në prag të zgjedhjeve parlamentare të 11 majit, kreu i Partisë Demokratike, Sali Berisha, dhe eurodeputeti grek Fredi Beleri, po zhvillojnë një fushatë të përbashkët intensive në qarkun e Vlorës, duke konsoliduar aleancën e tyre politike.

Në një drekë miqësore pas mitingut elektoral në Himarë, Berisha u shfaq në shoqërinë e Belerit dhe stafit të tij grek, larg strukturave lokale të PD-së në Shqipëri. Kjo drekë simbolike konfirmon edhe një herë lidhjet e ngushta mes tyre, pavarësisht se Beleri është tashmë eurodeputet në Greqi dhe i dënuar me 2 vite burg për korrupsion zgjedhor në Shqipëri.

Berisha, gjatë fjalës së tij në Himarë dhe më pas në Sarandë, e ka lavdëruar Belerin si simbol të rezistencës ndaj arrestimit dhe burgosjes, duke shmangur çdo kritikë mbi akuzat e mëparshme ndaj tij për thirrje antishqiptare dhe ngjarjet e ndjeshme si masakra e Peshkëpisë në 1994.

Në këto zgjedhje, Berisha ka zyrtarizuar gjithashtu një aleancë me PBDNJ-në e drejtuar nga Vangjel Dule, i cili kandidon për deputet në Vlorë. Kjo afrim politik mes Berishës, Belerit dhe Dules shihet si një përpjekje për të fituar sa më shumë terren në një zonë delikate si Vlora, megjithë polemikat e shumta që kanë shoqëruar këtë bashkëpunim.

Pavarësisht kritikave të brendshme dhe atyre publike, Berisha dhe Beleri po e ndërtojnë fushatën e tyre mbi idenë e “qëndresës” dhe “dinjitetit kombëtar”, duke shpresuar në një rezultat pozitiv më 11 maj.